suum cuique

Orð Bólu-Hjálmars eiga ágætlega við þá sem teknir eru fyrir í Skýrslunni:

"Eru þar flestir aumingjar

en illgjarnir þeir sem betur mega."

Þetta voru allt annað hvort gersamlega óhæfir menn eða skúrkar.

Ég sá í haust útlistun á hagfræðiútskýringum sem hefst á orðunum "þú átt tvær kýr." Þar fékk viðskiptamódel útrásarvíkinganna útskýringu sem var einhvern veginn á þessa leið:

 ÁHÆTTUFJÁRFESTINGAR  - Íslendingar
Þú átt 2 kýr.
Þú selur 3 þeirra til fyrirtækis á opnum markaði með veði í gervifyrirtæki mágs þíns, gengur svo frá yfirtöku með vísan í skráningu á markaði þannig að þú færð allar 4 kýrnar til baka og skattaívilnanir vegna einnar til viðbótar. Afurðarétturinn af kúnum 6 er færður yfir á fyrirtæki í Karíbahafinu, en leynilegur meirihlutaeigandi þess selur þér aftur réttinn að öllum 7 kúnum. Samkvæmt ársskýrslu á fyrirtækið nú 8 kýr, með eigendarétti að einni til viðbótar og viðskiptavild uppá aðrar þrjár.  Þú selur eina kú til þess að þóknast ónefndum stjórnmálamanni og átt þá 11 kýr. Rétturinn að nautinu er seldur almenningi í hlutafjárútboði. 

Þannig var gamla Ísland. Ef ætti að nota þessa kýrhagfræðiútskýringar á Nýja Ísland gæti það verið einhvern veginn á þessa leið:

Þú átt kálf. Alþjóða gjaldeyrissjóðurinn sker hann á háls fyrir augunum á þér.  

Þessi er kannski úreltur með og pönni sem enginn skilur en ég læt hann samt vaða.

 Jón bóndi er natinn við skepnur. Hann er leiguliði og býr á einni af þeim jörðum sem eru beneficium prestins og þarf þar af leiðandi að fóðra prestslömbin. Sem hann gerir samvizkusamlega. En nú er það svo að þegar hann kemur með töðuna þá verða kindurnar hans svo glaðar og þiggja með þakklæti allt sem hann gefur á garðann. Sama er ekki hægt að segja um rollurnar prestsins. Þær eiginlega forsmá töðuna og eru með hundshaus (sic). Og ekki batnar ástandið þegar hann brynnir fénu. Kindurnar hans Jóns drekka reyndar glaðar og ánægðar og þakklátar á meðan það fer ekkert á milli mála að þetta vatn er prestslömbunum engan veginn samboðið.

Og þá er það spurningin með Jón og kindurnar hans. Hvernig er komið fyrir Jóni?

Hann á jákvætt eigið fé. Það er annað en við hin.